عشرہ رحمت اللعالمین‘ محافل‘ نعتیہ‘ تقریری  مقابلوں‘ کانفرنسز کا سلسلہ جاری 

لاہور (نیوز رپورٹر) عشرہ رحمت اللعالمین کے سلسلے میں گزشتہ روز بھی پنجاب بھر میں نبی مکرم حضرت محمدﷺ کی شان میں مدح سرائی کیلئے میلاد کی محافل، نعتیہ مقابلوں، سیرت النبیؐ پر تقاریر اور علماء و مشائخ کانفرنسز میں تعلیمات نبویؐ پر روشنی ڈالنے کا سلسلہ  مذہبی جوش و خروش کے ساتھ جاری رہا۔ وزیر اعلیٰ پنجاب سردارعثمان بزدار کی ہدایات کی روشنی میں تمام اضلاع اور ڈویژنز کے انتظامی افسران نے اپنے شہروں میں تعلیمی اداروں، مساجد، مزارات اور سرکاری دفاتر میں عشرہ رحمت اللعالمین کے شیڈول میں طے شدہ تقریبات کا انعقاد یقینی بنایا۔ اس سلسلے میں تمام بڑے شہروں میں قائم آرٹس کونسلز کے ہالز میں محافل سماع اور اسمائے محمد پر کیلی گرافی کے مقابلے جاری ہیں۔ سرکاری عمارتوں اور مساجد پر چراغاں کیا گیا ہے۔