کراچی(اسپورٹس رپورٹر) آسٹریلیا میں کرکٹ کے چھوٹے فارمیٹ کا بڑا میلہ سج گیا، میگا ایونٹ کا آج سے آغاز ہوگا۔میگا ایونٹ سے قبل تمام کپتانوں کا گروپ فوٹو شوٹ کیا گیا۔ایونٹ کے افتتاحی روز گروپ اے کے دو میچ شیڈول ہیں، سری لنکا اور نمیبیا کے درمیان پہلا جوڑ پڑیگا، دوسرا میچ نیدر لینڈز اور متحدہ عرب امارات کی ٹیموں کے درمیان کھیلا جائیگا۔پاکستانی ٹیم ٹی ٹونٹی ورلڈ کپ میں شرکت کیلئے برسبین پہنچ گئی۔قومی ٹیم کرائسٹ چرچ سے آکلینڈ اور پھر برسبین پہنچی۔ فاسٹ بائولر شاہین شاہ آفریدی‘بیٹر فخر زمان‘سیکنڈ فزیوڈاکٹر جاوید ‘ مینٹور میتھیو ہیڈن نے برسبین میں قومی سکواڈ کو جوائن کرلیا ۔ قومی ٹیم اپنا پہلا وارم اپ میچ کل پیر کو انگلینڈ کیخلاف کھیلے گی ۔ دوسرا میچ 19 اکتوبر کو افغانستان سے شیڈول ہے،دونوں میچز گابا کرکٹ گرائونڈ میں کھیلے گی جو پاکستانی وقت کے مطابق1:30 اور صبح 8:30 بجے کھیلے جائیں گے۔قومی ٹیم میگا ایونٹ میں باقاعدہ مہم کا آغاز 23 اکتوبر کو بھارت کیخلاف میچ سے کریگی جو میلبورن میں کھیلا جائیگا۔پاکستان ٹیم کے کپتان بابر اعظم نے کہا ہے کہ نیوزی لینڈ کیخلاف سیریز میں جیت سے پاکستان ٹیم کو ورلڈ کپ سے قبل اچھا اعتماد ملا ہے، جس طرح آخری دو میچز میں مڈل آرڈر نے اچھا پرفارم کیا ہے، امید ہے ورلڈ کپ میں بھی مڈل آرڈر اچھا پرفارم کریگا۔میلبورن میں ورلڈ کپ سے قبل کپتانوں کی پریس کانفرنس کے دوران گفتگو میں بابر اعظم نے کہا کہ نیوزی لینڈ میں سہ فریقی سیریز کافی اہم رہی، یہ پاکستان کیلئے اچھی سیریز رہی، سیریز نے ٹیم کو ورلڈ کپ سے قبل کافی مدد دی، کوشش کرینگے کہ اسی مومینٹم کو لے کر ورلڈ کپ میں جائیں۔ مڈل آرڈر نے پچھلے دو میچز میں پرفارم کیا ہے، ورلڈ کپ سے قبل بطور ٹیم اگر ایسے اچھا پرفارم کریں تو اعتماد ملتا ہے، امید ہے کہ ورلڈ کپ میں مڈل آرڈر پرفارم کریگا۔ جس طرح شاداب اور نواز کھیلے ہیں اور اپنا کردار ادا کیا ہے وہ ٹیم کیلئے ایک اچھی نشانی ہے۔ پاکستان نے ہمیشہ ٹاپ فاسٹ بائولرز پیدا کئے ہیں، ہماری موجودہ فاسٹ بائولنگ یونٹ کافی مضبوط ہے جو شاہین شاہ آفریدی کے آنے سے اور بھی زیادہ مضبوط ہوگئی ہے، ہماری بینچ سٹرینتھ نے بھی اچھی بائولنگ کی اور اچھا پرفارم کیا، حارث رئوف جس طرح ڈیتھ میں بائولنگ کر رہا وہ کافی اچھا ہے، یہ ہمارے بائولرز کے پاس موقع ہے کہ ہم سب کو بتائیں کہ ہمارے پاس کیا کیا صلاحیتیں ہیں۔ پاکستان اور بھارت کا میچ ہمیشہ ہائی اینٹنسٹی گیم ہوتا ہے، فینز اس میچ کو انجوائے کرتے ہیں، ہم بھی انجوائے کرتے ہیں، کوشش کریں گے کہ اس میچ میں اپنا سو فیصد دیں۔بابراعظم نے بھارت کے خلاف میچ میں فاسٹ بائولرز کو اہم ہتھیار قرار دیدیااور کہا کہ شاہین شاہ کی موجودگی میں ہمارا فاسٹ بائولنگ کا شعبہ بہت مضبوط ہے، امید ہے شاہین زبردست طریقے سے کم بیک کریں گے۔ ہمارے پیسرز نے ٹیم کی کامیابیوں میں ہمیشہ اہم کردار اداکیا ہے، آسٹریلوی کنڈیشنز میں بھی وہ زبردست پرفارمنس دینے کی اہلیت رکھتے ہیں۔