قومی کرکٹ ٹیم بنگلور پہنچ گئی: بطور ٹیم بڑے میچ کیساتھ انصاف نہیں کیا: گرانٹ بریڈ برن

لاہور(سپورٹس رپورٹر) پاکستان کرکٹ ٹیم بھارتی شہر احمد آباد سے خصوصی طیارے پر بنگلور پہنچ گئی۔ پاکستان کرکٹ ٹیم آج پیر کو آرام کرے گی‘کل سے پریکٹس سیشن شروع ہوگا۔ پاکستان ٹیم ورلڈ کپ میں اپنا چوتھا میچ آسٹریلیا کےخلاف 20اکتوبر کو بنگلورو میں کھیلے گی۔ ورلڈ کپ میں پاکستان ٹیم 3 میچز میں سے 2 میچ جیت چکی ہے۔ہیڈ کوچ پاکستان کرکٹ ٹیم گرانٹ بریڈ برن نے کہا ہے کہ عام حالات میں ایسا یکطرفہ ماحول نہیں ہوتا ، ہم نے بطور ٹیم بھی بڑے میچ کے ساتھ انصاف نہیں کیا، ہمیں مزید جارح ہونے کی ضرورت تھی، ہم ایک موقع پر اچھا کھیل رہے تھے۔ یقین ہے کہ انڈین فینز بھی یہی چاہتے ہوں گے کہ پاکستانی سپورٹرز بھی یہاں ہوتے، یہ ورلڈ کپ میچ سا ماحول نہ لگا، ہمارا میوزک بھی نہیں تھا، ہمارے سپورٹرز گراو¿نڈ میں نہیں تھے، ماحول تو یکطرفہ ہونا تھا۔ میرا نہیں خیال کے اس سے پلیئر پر کوئی خاص اثر ہوتا ہے لیکن ہمیں میچ میں سپورٹ کے حوالے سے کوئی مختلف توقع نہ تھی، سو فیصد کراو¿ڈ مخالف ٹیم کے حق میں تھا۔ انڈیا نے بالکل ویسا ہی کھیلا جیسا ہم پلان کرکے آئے تھے، میچ میں کنڈیشنز کافی مختلف تھیں، ہم ہر میچ میں سیکھنے کی کوشش کرتے ہیں، ہم نے دو فتوحات سے سیکھا، شکست سے بھی سیکھیں گے، ورلڈ کپ کا ہر میچ اہم ہے، ہر حریف سخت ہے۔ ہم یہاں ہارنے نہیں آئے، پلیئرز میں صلاحیت ہے تاہم اپنی صلاحیت کے مطابق نہیں کھیل سکے، شکست پر ٹیم دلبرداشتہ ہے لیکن ہم نے اب بھی تین میں سے دو میچز جیتے ہوئے ہیں۔ ہم مختلف کامبی نیشن آزما سکتے ہیں، ہمیں سکواڈ میں شامل تمام 15 پلیئرز پر مکمل اعتماد ہے، ہمارے فاسٹ باﺅلر اچھے ہیں مگر کارکردگی میں تسلسل نہیں ہو پا رہا، ہم ورلڈ کپ میں نسیم شاہ کی کمی شدت سے محسوس کررہے ہیں۔