اسلام آباد(این این آئی)وفاقی وزیر برائے منصوبہ بندی و ترقی احسن اقبال نے کہا ہے کہ گوادر ایئرپورٹ اور سی پیک ٹو سے پاکستان کے لیے خوشحالی کی نئی راہیں کھلیں گی۔وفاقی وزیر احسن اقبال نے نجی ٹی وی سے گفتگو کرتے ہوئے کہا کہ چینی وزیراعظم گیارہ سال بعد پاکستان کا دورہ کر رہے ہیں، ہم چین کی مدد سے سی پیک 2 شروع کرنے جا رہے ہیں۔احسن اقبال نے مزید کہا کہ چین کے تعاون سے مستقبل قریب میں پانچ اقتصادی راہداری بھی کھولی جائیں گی، بلوچستان کے لوگوں کے لئے کاروباری سرگرمیاں بڑھانے کے لئے گوادر میں کارگو ہب قائم کیا جا سکتا ہے۔وفاقی وزیر نے علاقائی رابطے کے لئے شنگھائی تعاون تنظیم کے کردار پر تبصرہ کرتے ہوئے کہا کہ ریل اور سڑک کے رابطے وسطی ایشیائی ریاستوں اور یورپ کے ساتھ کاروباری تعلقات کو مضبوط بنائیں گے۔ایک سوال کے جواب میں انہوں نے کہا کہ خطے کے اس حصے میں اقتصادی سرگرمیوں کو بڑھانے کے لئے گوادر اور عمان کے روٹس کو بحال کیا جا سکتا ہے۔