لاہور(سپورٹس رپورٹر) قومی ٹی ٹوئنٹی ٹیم کے کپتان کا اعلان آج منگل کو کیا جائیگا۔ وسیع تجربے کے پیش نظر شاہد آفریدی فیورٹ بن گئے۔ نوجوان کرکٹرز فواد عالم اور صہیب مقصود بھی قیادت کی دوڑ میں شامل ہیں۔ بیس بیس اوورز کی قومی ٹیم کا اعلان سترہ ستمبر سے شروع ہونیوالے قومی ٹی ٹوئنٹی ٹورنامنٹ کے اختتام پر کیا جائیگا۔ پاکستان کرکٹ بورڈ کے چیئرمین شہریار خان نے کہا کہ آسٹریلیا اور نیوزی لینڈ کے خلاف سیریز کے ٹی ٹونٹی اور ون ڈے میچز کے لئے قومی ٹیم کے کپتان کا اعلان آج ہو جائیگا۔ کپتان کا تقرر کرنا میرے اختیار میں ہے جبکہ دیگر ٹی ٹونٹی، ون ڈے اور ٹیسٹ میچز کیلئے کھلاڑیوں کا انتخاب کرنا سلیکشن کمیٹی کا کام ہے۔ قذافی سٹیڈیم میں میڈیا سے غیر رسمی گفتگو کرتے ہوئے چیئرمین پی سی بی نے کہا سلیکشن کمیٹی کے معاملات میں مداخلت نہیں کرتا اور نہ ہی چیئرمین کو ایسا کرنا چاہئے۔ انہوں نے کہا کہ کوئی سلیکشن کمیٹی نہیں چاہتی کہ اس کی ٹیم ناقص کارکردگی کا مظاہرہ کرے۔