اسلام آباد:اپوزیشن منی بجٹ پیش کرنے کے حکومتی اقدام کو آڑے ہاتھوں لے گی

اسلام آباد (سپیشل رپورٹ) اپوزیشن جماعتیں پیر سترہ ستمبر کو پارلیمنٹ کے مشترکہ اجلاس سے صدر کے خطاب کے دوران تو شاید ہنگامہ آرائی نہ کریں لیکن اس کے بعد قومی اسمبلی کے اجلاس میں اپوزیشن کی طرف سے 2018 ء کے عام انتخابات میں ہونے والی مبینہ دھاندلی کے لئے کمشن بنانے کے مطالبے پر زور دیں گی۔ اپوزیشن ذرائع کے مطابق قومی اسمبلی کا اگلا اجلاس اس اعتبار سے ہنگامہ خیز ہو گا کہ اس میں انتخابات میں دھاندلی کی تحقیقات کے لئے کمشن بنانے کا معاملہ زور و شور سے اٹھایا جائے گا۔ اس کے علاوہ حکومت کی طرف سے سو دن میں معیشت کی کایا پلٹنے کے دعوؤں اور معیشت کو بہتر بنانے کے لئے کوئی ٹھوس اقدام سامنے نہ آنے پر کڑی تنقید کی جائے گی۔ اپوزیشن منی بجٹ پیش کرنے کے حکومتی اقدام کو بھی آڑے ہاتھوں لے گی۔