اسلام آباد ( سپیشل رپورٹ) چین نے سعودی عرب کو کورونا وائرس کے اثرات سے نمٹنے کے لیے طبی ماہرین کی ٹیم اور طبی  سازوسامان سعودی عرب بھیجنے کا اعلان کیا ہے۔ بیجنگ میں گزشتہ روز چینی وزارت خارجہ کے ترجمان نے بریفنگ میں سوالات کا جواب دیتے ہوئے کہا ہے کہ جب چین میں کورونا وائرس کی وباء پھوٹی تھی تو سعودی عرب نے چین کے ساتھ اظہار یکجہتی کیا تھا اور چین کو امداد کی پیشکش کی تھی جواباً چین نے سعودی عرب کو کورونا وائرس کی وباء سے نمٹنے کے لیے طبی ماہرین کی ٹیم سعودی عرب بھیجنے کا فیصلہ کیا ہے۔ ترجمان نے بتایا کہ چینی ماہرین میں لیبارٹریوں میں کورونا کے ٹیسٹ کرنے‘ کورونا کو پھیلنے سے روکنے کا طریقہ کار سیکھانے والے اس کے علاوہ سانس کے عارضہ سے نمٹنے والے بھی شامل ہیں۔ ترجمان نے کہا کہ ہم اس معاملے میں سعودی عرب کی بھرپور حمایت کریں گے۔