مارک باؤچر نے اے بی ڈویلیئرز کی بین الاقوامی کرکٹ میں ممکنہ واپسی کا اشارہ دیدیا

ملتان (سپورٹس ڈیسک)جنوبی افریقہ کے ہیڈ کوچ مارک باؤچر نے ٹی ٹونٹی ورلڈ کپ سے قبل اے بی ڈویلیئرز کی بین الاقوامی کرکٹ میں ممکنہ واپسی کا اشارہ دیا ہے۔ جنوبی افریقہ کے سابق وکٹ کیپر بیٹسمین نے آئی پی ایل 2021ء سے پہلے ڈی ویلیئرز کے ساتھ اپنی گفتگو کا انکشاف بھی کیا ہے۔ بائوچر نے مزید کہا کہ میں نے ڈیویلیئرز سے کہا کہ جاؤ اور پرفارم کرو، میں آپ کو آئی پی ایل کے آخر میں موقع دینے کے بارے میں سوچوں گا۔ باؤچر نے بتایا کہ یہ گفتگو ابھی بھی بہت ابتدائی سٹیج پر ہے اور وہ بہت جلد ڈیویلیئرز کے ساتھ دوبارہ بات چیت کریں گے۔بائوچر کا کہنا تھا کہ میں نے ڈیویلیئرز کے آئی پی ایل کھیلنے کے لیے جانے سے قبل بھی ان سے بات چیت کی تھی، ہماری گفتگو اب بھی ابتدائی مرحلے میں ہے۔ بائوچر نے گزشتہ روز میڈیا کو بتایا کہ ڈیویلیئرز جیسے انسان ہیں وہ آئی پی ایل میں بہترین کارکردگی دکھا کر یہ ثابت کرنا چاہتے ہیں کہ وہ اب بھی دنیائے کرکٹ کے بہترین بلے بازوں میں سے ایک ہیں۔