لاہور( خصوصی نامہ نگار)صدر منہاج القرآن انٹرنیشنل ڈاکٹر حسین محی الدین قادری نے سیدہ کائنات کے یوم وصال کے موقع پرکہا ہے کہ سیدہ فاطمۃ الزہرہؓ  جنتی عورتوں اور تمام کائنات کی مومنات کی سردار ہیں۔ جب بنت رسول خاتم النبینؐ سے ملنے کے لئے تشریف لاتیں تو آپ ؐ احتراماً کھڑے ہو جاتے تھے۔ تمام صحابہ کرام حضور نبی اکرم ؓ کی بارگاہ میں مخاطب ہونے سے پہلے کہتے تھے یا رسول اللہ میرے ماں اور باپ آپ پر قربان۔ ایک موقع پر حضور نبی اکرم ؓ نے سیدہ کائنات سے مخاطب ہونے سے پہلے فرمایا اے فاطمہ میرے ماں باپ تجھ پر قربان۔پیغمبر حق کی طرف سے اس طرح کا عزت و تکریم حصے میں آنا بہت بڑا اعزاز نعمت اور سعادت ہے جس کا کوئی بدل نہیں ہے۔ انہوں نے کہا کہ سیدہ کائنات حضور نبی اکرمؐ کی محبوب بیٹی تھیں۔ حضور نبی اکرم ؐ آپ سے بے حد پیار فرماتے تھے۔ ایک صحابی رسول ؐ نے حضرت عائشہ صدیقہ ؓ سے سوال کیا کہ رسول اللہ کو سب سے زیادہ محبوب کون تھا؟ حضرت عائشہ صدیقہؓ نے جواب دیا حضرت فاطمہؓ، پھر سوال کیا گیا مردوں میں سب سے زیادہ کون محبوب تھا؟ فرمایا فاطمہؓ کا شوہر علیؓ۔