ایسٹر کا پیغام، محبت اور انسانیت کا احترام ہے: پروفیسر الفرید ظفر

لاہور ( نیوز رپورٹر )پرنسپل پوسٹ گریجویٹ میڈیکل انسٹیٹیوٹ پروفیسر ڈاکٹر سردار محمد الفرید ظفر نے کہا کہ ایسٹر کا پیغام، محبت اور انسانیت کا احترام ہے اورمسیحی برادری کی پاکستان کی ترقی،تعلیم اور صحت کے شعبوں میں اعلیٰ خدمات کو کسی طور فراموش نہیں کیا جا سکتا اور ان خدمات کے اعتراف کے طور پر ساری قوم ایسٹر کے موقع پر اپنے مسیحی بہن بھائیوں کی خوشیوں میں برابر کی شریک ہے۔ انہوں نے کہا کہ لاہور جنرل ہسپتال میں مریضوں کی بہتر دیکھ بھال اور ہسپتال کے انتظامی معاملات کو احسن طریقے سے چلانے اور آنے والے مریضوں کی دن رات نگہداشت اور علاج گاہ کو مریض دوست بنانے کے ساتھ صاف ستھرا رکھنے میں مسیحی ملازمین ہمیشہ پیش پیش نظر آتے ہیں۔