لاہور (سپورٹس ڈیسک) پنجاب نیشنل سینئر سکواش ٹورنامنٹ میں کوارٹرفائنلز کھیلے گئے۔ آج سیمی فائنلز مقابلے کھیلے جائیں گے۔ پنجاب سکواش ایسوسی ایشن کے سیکرٹری شیراز سلیم کے مطابق چاروں کوارٹرفائنلز میں بہت دلچسپ مقابلے ہوئے۔ پہلے کوارٹرفائنل میں واپڈا کے احسن زیب نے عزیر رشید کو زبردست مقابلے کے بعد 12/14, 7/11, 11/4, 11/9, 11/9 سے ہرا دیا۔احسن زیب نے پہلی دو گیمز ہاریں جبکہ اگلی تینوں گیمز جیت کر سیمی فائنل کھیلنے کا اعزاز حاصل کیا۔ دوسرے کوارٹرفائنل میں ایس این جی پی ایل کے کاشف آصف نے نیوی کے فراز محمد کو 11/6, 11/4, 11/9 سے ہرا دیا۔ تیسرے کوارٹرفائنل میں پاکستان ایئرفورس کے وقاص محبوب نے کے پی کے عباس شوکت کو 9/11, 12/10, 11/6, 11/5 سے ہرا دیا۔ چوتھے اور آخری کوارٹرفائنل میں آرمی کے صدام الحق نے پی اے ایف کے مہران جاوید کو 9/11, 11/8, 12/10, 11/4 سے ہرا کر سیمی فائنل کیلئے کوالیفائی کرلیا۔