میلسی  کے  تعزیہ جلوسوں کے روٹس گندے  پانی کی لپیٹ میں

میلسی(نمائندہ نوائے وقت)انتظامی افسران کی نا اہلی کی وجہ سے محرم اکے تعزیہ جلوسوں کے روٹس گندے پانی کی لپیٹ میں آ گئے  ۔ تفصیل کیمطابق محرم الحرام کے تعزیہ سمیت دیگر جلوس شہر کے مقررہ روٹس پر گزر کر اپنی منزل کی جانب روانہ ہوتے ہیں ان روٹس کے علاقوں مدینہ مسجد، سرکلر روڈ، گلی بھولو شاہ والی، ووکیشنل سنٹر، بالی والی چکی، چوک گیارویں شریف، مدنی مسجد اور دیگر علاقے سیوریج کے گندے پانی سے بھرے ہوئے ہیں اور ان راستوں سے عام آدمی کا گزرنا بھی محال ہو چکا ہے اور اس صورتحال کی وجہ سے جلوسوں کے لائسنسداران شدید پریشانی کا شکار ہیں  گذشتہ شب 7محرم الحرام کے جلوس کی تشبیہ کے ساتھ جلوس کے منتظمین اور عزاداران پانی میں کھڑے ہو کر ماتم کرتے رہے اور ضلعی انتظامیہ کیخلاف بھی شدید احتجاج کیا انجمن حسینیہ کے جنرل سیکرٹری  الہٰی بخش اور حاجی سخاوت حسین نے نوٹس لینے کا مطالبہ کیا ہے ۔