اینٹی نارکوٹکس فورس‘8 کارروائیوں میں 38کلو منشیات برآمد‘ 8 ملزم گرفتار

لاہور(نامہ نگار)اینٹی نارکوٹکس فورس کی جانب سے منشیات سمگلنگ کے خلاف کارروائیوں کا سلسلہ جاری ہے۔8 مختلف کارروائیوں میں 38کلو منشیات برآمد کرکے 8 ملزمان گرفتار کر لئے گئے ہیں۔ترجمان اے این ایف کے مطابق پشاور ائیرپورٹ پر دوحہ جانے والے دو مسافروں سے 2.5کلو آئس برآمد ہوئی، لاہور ایئرپورٹ پر کارگو آفس سے برطانیہ بھیجے جانے والے پارسل سے 990گرام ہیروئن، لاہور ایئرپورٹ پر ملائیشیا جانے والے مسافر سے 65عدد ہیروئن بھرے کیپسولز،اسلام آباد ایئرپورٹ پر سعودیہ جانے والے مسافر سے 680 گرام ہیروئن، آر سی ڈی روڈ حب کے قریب ملزم سے 30کلو آئس برآمد، شیر شاہ ٹول پلازہ ملتان کے قریب ملزم سے 2.4کلو چرس،کاک پل اسلام آباد کے قریب ملزم سے 400 گرام چرس،ایم ون اسلام آباد کے قریب ملزم سے 390 گرام آئس برآمد ہوئی ہے۔