کراچی (اسپورٹس ڈیسک) ہاکی ورلڈ کپ 2018 فائنل میں بیلجیئم سنسنی خیز مقابلے کے بعد ورلڈ کپ کی 3 مرتبہ کی فاتح ٹیم نیدر لینڈز کو شکست دے کر ہاکی کا نیا عالمی چیمپئن بن گیا۔بھارت کے شہر بھونیشور میں کھیلے گئے ایونٹ کے فائنل میں بیلجیئم کی ٹیم نے نیدرلینڈز کی ٹیم کو پینلٹی شوٹ آؤٹ میں 2-3 سے شکست دے دی۔میچ کے مقرر کردہ 60 منٹ میں بیلجیئم اور نیدر لینڈز کی ٹیم میں سے کوئی بھی ٹیم گول اسکور نہیں کرسکی جس کے بعد پینالٹی شوٹ آؤٹ کے ذریعے مقابلہ ہوا۔پینالٹی شوٹ آؤٹ میں نیدرلینڈز نے پہلے گول کرنے کا موقع حاصل کیا اور جیرون ہیرٹز ٹیم کے لیے ایک گول اسکور کرنے میں کامیاب ہوگئے۔ جس کے بعد بیلجیئم کی جانب سے آرتھر ڈورن نے پوزیشن سنبھالی لیکن گول کرنے میں ناکام ہوگئے۔نیدر لینڈز کی ٹیم کی جانب سے دوسرا گول مائیکرو رائسر اور بیلجیئم کی ٹیم سے فیلکس ڈینائیر نے کیا لیکن دونوں ہی گول کرنے میں ناکام ہوگئے۔اس کے بعد پینالٹی شوٹ آؤٹ کا تیسرا گول نیدرلینڈز کے جوناس ڈی گیوس نے کیا جس کے بعد اسکور 0-2 ہوگیا۔بیلجئم نے تیسرے گول کے لیے پوزیشن سنبھالی تو فلورنٹیو ٹیم کو پہلا گول دلانے میں کامیاب ہوگئے۔نیدر لینڈز کی جانب سے سیو نے گول کرنے کی کوشش کی لیکن ناکام ہوئے لیکن بیلجیئم کے وکٹر ویگنیز نے ٹیم کے لیے دوسرا گول اسکور کیا جس کے بعد میچ 2-2 سے برابر ہوگیا۔تاہم ، پینالٹی شوٹ آؤٹ کے آخری موقع میں مقابلہ مزید سخت ہوا اور نیدر لینڈز کے تھیجس وان ڈیم اور بیلجیم کے آرتھر نے گول ضائع کردیے جس کے بعد میچ 2-2 سے برابر رہا۔پنالٹی شوٹ پر بھی میچ کا فیصلہ نہیں ہوسکا جس کے باعث پنالٹی شوٹ آؤٹ کا سڈن ڈیتھ سیشن ہوا جس میں نیدر لینڈز گول نہیں کرسکا اور بیلجیئم کے کھلاڑی نے گول کرکے ٹیم کو پہلی مرتبہ ہاکی ورلڈ کپ میں کامیابی دلا کر نیا عالمی چیمپئن بنادیا۔اس سے قبل ہاکی ورلڈ کپ 2018 کی تیسری پوزیشن کے میچ میں آسٹریلیا نے انگلینڈ کو 1-8 سے شکست دی ۔واضح رہے کہ گزشتہ روز بیلجیئم نے انگلینڈ کو 0-6 کی عبرتناک شکست دے کر فائنل میں جگہ بنائی تھی۔