اسلام آباد : وزیر خارجہ شاہ محمود قریشی متحدہ عرب امارات کےدو روزہ دورے پر دبئی پہنچ گئے۔
تفصیلات کے مطابق دبئی میں پاکستانی قونصل جنرل احمد امجد علی، سفارتخانے کے اعلیٰ حکام ،اماراتی وزارت خارجہ کے اعلیٰ حکام نے دبئی ائرپورٹ پر انکا استقبال کیا۔ وزیرخارجہ شاہ محمود قریشی دورے کے دوران اماراتی قیادت سے ملاقاتیں کریں گے۔
وزیرخارجہ متحدہ عرب امارات کی قیادت سے علاقائی اور عالمی امورسمیت باہمی دلچسپی کے تمام شعبوں پرتبادلہ خیال کریں گے۔ دفترخارجہ کا کہنا ہے کہ وہ دوطرفہ تعاون، تجارت، سرمایہ کاری اورپاکستانی برادری کی فلاح وبہبود پر تبادلہ خیال کریں گے۔ وزیر خارجہ مخدوم شاہ محمود قریشی پاکستانی برادری سے ملاقات اورمقامی اورعالمی ذرائع ابلاغ سے بات چیت بھی کریں گے ۔
توقع ہے کہ وزیر خارجہ کے اس دورہ سے پاکستان اور متحدہ عرب امارات کے
مابین دو طرفہ تعلقات مزید مستحکم ہوں گے۔ وزیر خارجہ کا یہ دورہ مسلم ممالک کے ساتھ اعلیٰ سطح کے روابط کے فروغ کا تسلسل ہے۔