لاہور(نامہ نگار)لاہور پولیس کے127اسسٹنٹ سب انسپکٹرز کوسب انسپکٹرز جبکہ 486 کانسٹیبلز کو ہیڈکانسٹیبلزکے عہدوں پر ترقی دیدی گئی۔ سی ٹو کے 92 کانسٹیلزکو بھی ہیڈکانسٹیبل کے عہدے پر ترقی دیدی گئی۔ترقی پانے والوں میں آپریشنز، انوسٹی گیشن، سکیورٹی ڈویژن سمیت مختلف یونٹس کے پولیس افسران و اہلکار شامل ہیں۔رواں سال لاہور پولیس کے 852پولیس ملازمین کو سب انسپکٹر جبکہ779کو ہیڈ کانسٹیبل کے عہدے پر ترقی دی گئی ہے۔لاہور پولیس کے ترقی پانے والے افسران و اہلکاروں کے اعزاز میں کیپٹل سٹی پولیس آفس میں تقریب منعقدہوئی۔ترقی پانے والے افسران و اہلکاروں کو اگلے عہدوں کے بیج لگائے گئے۔ ایس ایس پی ایڈمن عاطف نذیر نے ایس ایس پی(لیگل)غلام حسین چوہان کے ہمراہ پولیس افسران کو پروموشن رینک کے بیجز لگائے۔سی سی پی او لاہوربلال صدیق کمیانہ نے ترقی پانے والے افسران و اہلکاروں کو مبارکباد دیتے ہوئے جذبہ خدمت ِخلق سے فرائض سر انجام دینے کی ہدایت کی۔انہوں نے کہا کہ پولیس ملازمین کی ترقیوں کے معاملات تیزی سے طے کئے جا رہے ہیں۔ ملازمین کی بروقت پروموشن سے شہریوں کی خدمت اور سروس ڈیلیوری میں مزید بہتری آنی چاہئے۔ میرٹ اور سنیارٹی کے مطابق لاہور پولیس کے ونگز کے تمام رینک پر ترقی کا عمل جاری ہے۔ بلال صدیق کمیانہ نے اگلے عہدوں پر ترقی پانے والے پولیس افسران و اہلکاروں کو کمیونٹی پولیسنگ کے تحت شہریوں کو خوش اخلاقی کیساتھ بہترین خدمات مہیا کرنے کی ہدایات دیں۔