افغانستان : کانوائے پر حملہ‘ سات نیٹو فوجی ہلاک‘ امریکہ کا انجام سوویت یونین جیسا ہو گا : طالبان

کابل (نوائے وقت نیوز) افغانستان کے صوبے ننگرہار میں نیٹو فورسز کے قافلے پر طالبان کے حملے میں نیٹو کے7 فوجی ہلاک ہوگئے۔ جوابی کارروائی میں 9 طالبان بھی مارے گئے۔ افغان سکیورٹی ذرائع کے مطابق ننگرہارمیں جلال آباد، کابل شاہراہ پر افغان طالبان نے نیٹو فورسز کے قافلے پر حملہ کیا۔ حملے میں نیٹو فورسز کے 7فوجی ہلاک اورمتعدد زخمی ہوگئے جبکہ ایک ٹینک سمیت متعدد گاڑیاں بھی تباہ ہوئیں۔ حملے کے بعد نیٹو کے جنگی طیاروں نے طالبان کے ٹھکانوں پر بمباری کی۔ افغان طالبان کے ترجمان ذبیح اللہ مجاہد کے مطابق حملے میں9 طالبان نے حصہ لیا جو نیٹو کی بمباری میں مارے گئے۔ جھڑپ کا سلسلہ 6 گھنٹے تک جاری رہا۔
واشنگٹن (آن لائن) افغان طالبان نے افغان عوام پر زور دیا ہے کہ وہ اسی طرح متحد ہوکر امریکہ کو اپنے ملک سے نکال دیں جس طرح انہوں نے سوویت فوجوں کو نکالا تھا، آج امریکہ اسی بدقسمتی کا سامنا کرنے کے بعد افغانستان سے بھاگنے کے بہانے ڈھونڈ رہا ہے جس سے سوویت یونین دوچار ہوا تھا۔  افغانستان سے سوویت یونین کے فوجی  انخلا ء کے 25 سال مکمل ہونے  طالبان ترجمان قاری یوسف احمدی کی جانب سے مغربی ذرائع ابلاغ کو بذریعہ ای میل بھیجے جانے والے ایک بیان میں کہا گیا ہے کہ 'اماراتِ اسلامیہ افغانستان' اپنے عوام سے اپیل کرتی ہے کہ وہ "آج کے غاصبوں کے ساتھ بھی وہی سلوک کریں جو انہوں نے ماضی کے حملہ آوروں کے ساتھ کیا تھا"۔خیال رہے کہ طالبان اپنی حکومت کو 'اماراتِ اسلامیہ' کہا کرتے تھے جو 1996ء سے 2001ء  میں افغانستان پر امریکی حملے سے قبل تک برسرِ اقتدار تھی۔پچیس سال قبل 15 فروری 1989ء کو سوویت یونین کا آخری فوجی دستے بھی شمالی افغانستان کو اس وقت کے سوویت یونین سے ملانے والا پل پار کرگیا تھا جس کے بعد افغانستان پر سے سوویت یونین کا ایک دہائی طویل فوجی قبضہ اپنے اختتام کو پہنچا تھا۔افغانستان سے سوویت فوجیوں کا انخلا جنیوا میں طے پانے والے بین الاقوامی معاہدوں کے تحت عمل میں آیا تھا۔ دس سال سے زائد عرصہ جاری رہنے والی افغان جنگ میں سوویت فوجوں کی بدترین شکست کے نتیجے میں کچھ عرصے بعد ہی سوویت یونین کا شیرازہ بکھر گیا تھا۔افغان عوام 15 فروری کو قومی دن کے طور پر مناتے ہیں اور اس روز ملک بھر میں عام تعطیل ہوتی ہے۔ طالبان ترجمان نے کہا  کہ وہ امریکہ کو یاد دلانا چاہتے ہیں  کہ انہوں نے ماضی میں بھی "خوبصورت اور چکنے چپڑے نعرے لگانے والے حملہ آوروں کو قبول نہیں کیا تھا اور انہیں دنیا کے نقشے سے مٹادیا تھا"۔بیان میں کہا گیا  ہے کہ اگر خدا کی مرضی ہوئی تو امریکہ بھی اسی انجام سے دوچار ہوگا۔طالبان کا یہ انتباہ ایک ایسے وقت میں سامنے آیا ہے جب امریکہ افغان صدر حامد کرزئی پر دو طرفہ سکیورٹی معاہدے پہ دستخط کرنے کے لیے دبائو  بڑھا رہا ہے۔مجوزہ معاہدے کے تحت 2014ئ￿  کے اختتام تک افغانستان سے تمام غیر ملکی افواج کے انخلا کے بعد بھی چند ہزار امریکی فوجی افغانستان میں ٹہر سکیں گے جو وہاں مقامی فورسز کی تربیت اور معاونت کے فرائض انجام دیں گے۔امریکہ اور اس کے اتحادیوں کا اصرار ہے کہ افغانستان کی سکیورٹی کی صورتِ حال اور طالبان کی واپسی کو روکنے کے لیے ضروری  ہے کہ 2014ء  کے طے شدہ انخلا کے بعد بھی نیٹو افواج کے کچھ دستے افغانستان میں موجود رہیں۔تاہم مغربی ممالک کے تمام تر دباو? کے باوجود صدر کرزئی مجوزہ معاہدے پر دستخط سے انکاری ہیں اور انہوں نے معاہدے کی منظوری کا فیصلہ نئے آنے والے صدر پر چھوڑدیا ہے جو اپریل میں ہونے والے صدارتی انتخاب کے بعد اقتدار سنبھالیں گے۔