لاہور (خصوصی رپورٹر) وزیر اعلیٰ شہباز شریف سے استنبول کے مئیر ڈاکٹر قادر توپباش نے ملاقات کی جس میں باہمی دلچسپی کے امور، دو طرفہ تعلقات کے فروغ اور مختلف شعبوں میں تعاون بڑھانے پر تبادلہ خیال کیا گیا۔ وزیراعلیٰ محمد شہباز شریف نے اس موقع پر گفتگوکرتے ہوئے کہا کہ مئیر استنبول ڈاکٹر قادر توپباش کا دورہ لاہور بڑھتے ہوئے پاک ترک تعلقات کا عکاس ہے، ڈاکٹر قادر توپباش نے کہا کہ شہباز شریف نے ہمیشہ کی طرح بے پناہ محبت اور خلوص سے ہماری پذیرائی کی ہے اور پنجاب آ کر لگتا ہے کہ میں اپنے ہی گھر میں ہوں۔ انہوں نے کہا کہ وزیراعلیٰ شہباز شریف کے فلاح عامہ کے کام ایک رول ماڈل بن چکے ہیں ۔