سیہون شریف دھماکے کے بعد دربار بی بی پاکدامن خالی‘ داتا دربار سمیت اہم مقامات کی سکیورٹی سخت کر دی گئی

لاہور (نامہ نگار) دہشت گردی کے خدشات کے پیش نظر گزشتہ رات لاہور میں دربار بی بی پاکدامن کو خالی کرا کر ملحقہ راستے سیل کر دیئے گئے جبکہ داتا دربار کی طرف آنے والی سڑکوں کو عام ٹریفک کیلئے بند کرکے کمانڈوز کی بڑی تعداد تعینات کر دی گئی ہے۔ تفصیلات کے مطابق سندھ میں سیہون شریف میں دہشت گردی کے واقعہ کے بعد لاہور میں اہم مقامات پر سکیورٹی بڑھانے کے ساتھ ساتھ دربار بی بی پاکدامن کو زائرین سے خالی کرا دیا اور اس طرف آنے والے تمام راستے بیریئر و خاردار تاریں لگا کر بند کر دیئے اور علاقہ کو غیرمتعلقہ لوگوں کیلئے سیل کر دیا گیا۔ اس کے علاوہ داتا دربار کی طرف آنے والی ٹریفک کو کچہری چوک پر بیریئر لگا کر داخلہ بند کر دیا گیا اور ٹریفک کو کچہری چوک سے موہنی روڈ کی جانب جانے کی اجازت دی گئی جس سے یہاں ٹریفک کا بدترین جام ہو گیا۔ علاوہ ازیں داتا دربار میں کمانڈوز کو بھی تعینات کر دیا گیا اور چیکنگ کا نظام بڑھا دیا گیا ہے۔
دربار بی بی پاکدامن