سینٹیاگو(آئی این پی) جنوبی امریکا میں واقع ملک چلی کے گھنے جنگل میں آتشزدگی کے باعث دو افراد ہلاک ہوگئے۔تفصیلات کے مطابق جنگل میں آگ بھڑکنے سے دو افراد ہلاک ہوگئے جبکہ آگ وسیع علاقے تک پھیل گئی، کئی حصے جل کر خاک ہوگئے۔غیر ملکی خبر رساں ادارے کے مطابق چلی کی مقامی حکومت کا کہنا ہے کہ گھنے جنگل میں لگنے والی آگ نے شدت اختیار کی تاہم ریسکیو عملے نے قابو پالیا۔مقامی حکومت کے مطابق انتالیس ہزار ہیکٹر علاقہ آگ سے خاکستر ہوگیا، مقامی فائرفائٹرز نے تیس طیاروں اور ہیلی کوپٹروں کے ساتھ آگ بجھانے کے عمل میں ساتھ دیا۔حکومتی اراکین نے قریبی آبادی کو محفوظ مقام پر منتقل کرنے کے لیے امدادی کام جاری رکھا، علاوہ ازیں جنگل کے گرد رہائشیوں نے اپنی مدد آپ فرنیچر کو محفوظ مقامات پر منتقل کیا۔