لاہور(سپورٹس رپورٹر)لاہور قلندرز میں شامل زمبابوین آل راؤنڈر سکندر رضا نے کہاہے کہ ٹائٹل کے دفاع کیلئے  لاہور قلندرز کو پہلے سے بھی بہتر کرکٹ کھیلنا ہو گی، قلندرز کے سکواڈ میں وہ تمام اجزا موجود ہیں جو ایک ٹیم کو چیمپئن بننے کیلئے درکار ہیں۔ایک میچ ایک رن سے جیتا گیا، دوسرا میچ دو رنز سے، اب اس سے زیادہ سخت مقابلہ اور کیا ہوسکتا ہے؟ ابتدا میں ایسے زبردست میچز لیگ کیلئے کافی فائدہ مند ہیں۔ وہ پاکستان سپر لیگ میں قلندرز کا حصہ بننے پر خوش ہیں، پاکستان آکر اچھا لگ رہا ہے ‘زبر دست میچز فائدہ مند ہیں  ۔  اب تک جتنی  لیگز کھیلی ہیں پاکستان سپر لیگ کا معیار سب سے بہتر ہے۔ دنیا یہی مانتی ہے کہ پی ایس ایل دنیا کی دو بہترین لیگز میں سے ایک ہے۔ وہ اپنے ذاتی اہداف اپنی ذات تک رکھیں گے، اس بارے میں کچھ نہیں کہیں گے، لیکن اتنی ضرور کوشش ہو گی کہ لاہور کو ایک بار پھر چیمپئن بنوائیں اور جو بھی ذمہ داری ملے اس کو دیانتداری کے ساتھ نبھائیں۔ ان کے کھیل کی وجہ سے زمبابوے میں جو ان کو مقام مل رہا ہے اس پر وہ خوش بھی ہیں مگر ساتھ ساتھ ذمہ داری بھی محسوس کر رہے ہیں۔ کوشش ہوگی زمبابوے کرکٹ کیلئے مثالی کردار ادا کروں جس سے نوجوانوں کو مثبت میسج جائے اور ہر چیز ٹھیک انداز میں کریں۔ 2022 ان کیلئے بہت اچھا رہا، دعا ہے کہ 2023 اور بھی اچھا رہے۔