لاہور(سپورٹس رپورٹر) پی ایس ایل 8 کے میچز کے ٹکٹس کیلئے بچوں کی دہائی پر چیئرمین پاکستان کرکٹ بورڈمینجمنٹ کمیٹی نجم سیٹھی نے بڑا اعلان کرتے ہوئے طلبہ اور اٹھارہ سال سے کم  عمر افراد کیلئے ٹکٹوں کی قیمت آدھی کردی۔ چیئرمین پی سی بی مینجمنٹ کمیٹی نے کہا کہ یہ پیشکش ابھی صرف کراچی کے میچز کیلئے ہے۔ واضح رہے کہ بچوں نے نجم سیٹھی کو سٹیڈیم میں روک کر فریاد کی۔ بچوں نے چیئرمین پی سی بی مینجمنٹ کمیٹی سے اپیل کی کہ اتنے مہنگے ٹکٹس خرید نہیں سکتے۔اس پر نجم سیٹھی نے کہا کہ صرف طالب علموں کو آدھی قیمت پر ٹکٹس ملیں گے، ساتھ آنے والے فیملی ممبرز کو نہیں۔ قیمتیں آدھی کرنے پر پی ایس ایل 8 کے میچز دیکھنے کے خواہشمند بچے خوشی سے نہال ہوگئے۔ انہوں نے اس اعلان پر چیئرمین پی سی بی مینجمنٹ کمیٹی نجم سیٹھی کا شکریہ ادا کیا۔