لاہور(سپورٹس رپورٹر)لاہور قلندرز کے کپتان شاہین شاہ آفریدی نے اپنی فٹنس پر اٹھنے والے سوالات کو بے بنیاد قرار دیدیا۔انہوں نے کہا کہ وہ مکمل طور پر فٹ ہیں اور انہیں فٹنس کے حوالے سے کوئی مسئلہ درپیش نہیں۔ ملتان سلطانز کیخلاف فتح کے بعد خاصے بلند ہیں۔  شاہد آفریدی ان کیلئے بڑی اہمیت رکھتے ہیں، ان سے بہت کچھ سیکھا ہے۔ لالہ جتنے اچھے کرکٹر رہے اتنے بڑے انسان بھی ہیں۔ محمد عامر کا بابر اعظم کے متعلق کہنا کہ وہ اور ٹیل اینڈرز کے خلاف گیند کرنا ایک جیسا ہے، سمجھ نہیں آیا۔ بابر اعظم ایک ورلڈ کلاس بیٹر ہے، لوگ اسے کھیلتا دیکھنا چاہتے ہیں۔ ماضی میں پاکستان سپر لیگ کے میچ میں سرفراز احمد کیساتھ ان کی تلخی آج بھی ان کیلئے افسوسناک لمحہ ہے۔ انہوں نے سرفراز احمد سے تب بھی معافی مانگی تھی اور آج بھی  معافی مانگتے ہیں۔ پاکستان سپر لیگ میں تمام ٹیمیں اچھی ہیں، جہاں تک لاہور قلندرز کا تعلق ہے، ہم اعزاز کا دفاع کرنے میں سر دھڑ کی بازی لگا دیں گے۔ قذافی سٹیڈیم لاہور میں اہلیان لاہور ہمیں بھرپور انداز میں سپورٹ کرنے میدان میں آئیں گے تو ہمارا حوصلہ بڑھے گا۔