لاہور (نامہ نگار) شہرکے مختلف علاقوں میں ڈاکوئوں اور چوروں نے وارداتوں کے دوران متعدد شہریوں سے لاکھوں روپے مالیت کی نقدی، طلائی زیورات، موبائل فون، گاڑیاں، موٹر سائیکلیں اور دیگر سامان لوٹ لیا ہے۔ تفصیلات کے مطابق چوہنگ کے علاقہ میں نعمان کے گھر میں 4ڈاکوئوں نے فیملی کو یرغمال بنا کر 6لاکھ مالیت کی نقدی اور طلائی زیورات لوٹ کر فرار ہو گئے۔ گوالمنڈی کے علاقے میں عاصم کے گھر سے دوڈاکو فیملی کو یرغمال بنا کر3لاکھ 75ہزارکی نقدی اور قیمتی سامان لوٹ کر فرار ہو گئے۔ شمالی چھائونی کے علاقہ میں ناصرکے گھر سے فیملی کو یرغمال بنا کر2لاکھ 55ہزار کی نقدی اور طلائی زیورات، موبائل فون لوٹ کر فرار ہو گئے۔ مصطفی ٹائون کے علاقہ میں بابر کے گھر میں اس کی فیملی سے 2لاکھ 50ہزار کی نقدی اور طلائی زیورات لوٹ کر فرار ہو گئے۔ جوہر ٹائون کیو بلاک کے علاقہ سے اخترکے گھر سے فیملی کو یرغمال بنا کر2لاکھ روپے کی نقدی اور موبائل فون، ماڈل ٹائون کے علاقہ میں اکرم کی فیملی کو یرغمال بنا کر 89ہزار نقدی اور موبائل فون لوٹ لیا ہے ۔ ڈاکوؤں نے شہر کے مختلف علاقوں میں راہزنی کی 6وارداتوں میں شہریوں سے ہزاروں روپے نقدی اور موبائل فون لوٹ لئے ہیں۔ چوروں نے فیکٹری ایریا میںرضوان، کوٹ لکھپت میں یاسر کی گاڑیاں جبکہ نواب ٹائون میں نعیم ،اسلام پورہ میںسہیل، مستی گیٹ میں وارث، لٹن روڈ میں بلال اور ماڈل ٹائون میںجمیل کی موٹرسائیکلیں چوری کر لی ہیں۔