جڑانوالہ: بجلی و گیس کی غیراعلانیہ لوڈشیڈنگ جاری‘ شہری سراپا احتجاج

جڑانوالہ (نمائندہ نوائے وقت) شہر وگردونواح میں گیس اور بجلی کی بڑھتی ہوئی غیر اعلانیہ لوڈ شیڈنگ نے عوام کی زندگی اجیرن بناکر رکھ دی، طلباء وطالبات کی اکثریت ناشتہ کے بغیر سکولز جانے پر مجبور،گیس کی غیر منصفانہ لوڈ شیڈنگ پر شہریوں نے شدید ردعمل دیا ہے۔ تفصیلات کے مطابق شہروگردونواح میں گیس اور بجلی کی طویل دورانیے کی لوڈ شیڈنگ پر عوام نے شدید رد عمل کا اظہار کرتے ہوئے کہا ہے کہ مزکورہ محکمہ جات کی طرف سے شہروگردونواح میں لوڈشیڈنگ کی غیر منصفانہ تقسیم سے انہیں شدید مشکلات کا سامنا کرنا پڑرہا ہے۔ دوسری طرف گیس کی لوڈ شیڈنگ سے لکڑی کی مصنوعی قلت پیدا کرکے منہ مانگے دام وصول کئے جا رہے ہیں۔ شہریوں نے حکومت سے اپیل کی ہے کہ وہ لوڈ شیڈنگ کی منصفانہ تقسیم کو یقینی بنائیں تاکہ غریب کو دووقت کی روٹی کیلئے دھکے نہ کھانا پڑیں ۔