ا 
اسلام آباد (خصوصی نامہ نگار) امریکہ میں پا کستانی سفیر مسعود خان کو ڈاکٹر مارٹن لوتھر کنگ جونیئر لیگیسی ایوارڈ برائے سفارت کاری و بین الاقوامی خدمات سے نوازا گیا۔ یہ ایوارڈ ان کی قائدانہ صلاحیتیوں، عزم اور  خدمات کے اعتراف میں دیا گیا ہے۔  یہ ایوارڈ ڈاکٹر مارٹن لوتھر کنگ جونیئر کی زندگی اور میراث کے حوالے سے منعقدہ  31ویں بین الاقوامی سلوٹ  تقریب کے موقع پر دیا گیا۔ تقریب میں  امریکی سینیٹرز، قانون سازوں، سفارت کاروں، کاروباری شخصیات، کمیونٹی لیڈرز اور ماہرین تعلیم سمیت 150 سے زائد شرکاء نے شرکت کی۔ اس موقع پر سفیر پاکستان مسعود خان کو مارٹن لوتھر کنگ انٹرنیشنل سیلوٹ کا اعزازی چیئرمین بھی نامزد کیا گیا۔ رواں سال مارٹن لوتھر کنگ لیگیسی ایوارڈ وصول کرنے والی دیگر شخصیات میں میری لینڈ کے سینیٹر کرس وان ہولن، میری لینڈ کے سیکرٹری آف  سٹیٹ جان ووبین سمتھ،  السیک نامی تنظیم /سینٹ جوڈ چلڈرن ریسرچ ہسپتال کے صدر اور سی ای او رچرڈ شیڈیئیک اور سینئر ڈائریکٹر پبلک افیئرز، کارپوریٹ سٹیزن شپ گیلیڈ سائنسز شینیل ایل میک گوئے  شامل ہیں۔ ایوارڈ دینے پر سفیر پاکستان نے انسٹی ٹیوٹ فار دی ایڈوانسمنٹ آف ملٹی کلچرل اینڈ مینارٹی میڈیسن کا شکریہ ادا کرتے ہوئے کہا کہ ڈاکٹر مارٹن لوتھر کنگ جونیئر کی معروف شخصیت اور ان کے مشن سے وابستہ ہونا ان کے لیے بہت بڑا اعزاز ہے۔
 پاکستانی سفیر؍ ایوارڈ