اٹک کی مویشی منڈیوں میں کورونا ویکسینیشن ڈیسک قائم کئے گئے ہیں : حسنین دریشک 

اٹک + حسن ابدال (نامہ نگاران)صوبائی وزیر لائیو سٹاک پنجاب سردار حسنین بہادر دریشک نے کہا ہے کہ حکومت پنجاب عید الاضحی کے موقع پر عوام کو ہر قسم کی سہولت فراہم کر نے کے لیے کوشاں ہے۔انہوں نے ان خیالات کا اظہار حسن ابدال اور اٹک کی مویشی منڈیوں کے دورے کے موقع پر کیا۔ان کے ہمراہ ایڈیشنل ڈپٹی کمشنر ریونیو شہریار عارف خان، اسسٹنٹ کمشنر حسن ابدال زونیرہ جلیل، اسسٹنٹ کمشنراٹک محمد سلیم راجہ،چیف آفیسر ساجد علی خان، محکمہ لائیو سٹاک کے افسران بھی موجود تھے۔صوبائی وزیر نے دونوں مویشی منڈیوں کا تفصیلی جائزہ لیا۔متعلقہ افسران نے انہیں منڈیوں میں کیے جانے والے انتظامات پر تفصیلی بریفنگ دی۔ صوبائی وزیر لائیو سٹاک پنجاب سردار حسنین بہادر دریشک نے کہا کہ ضلع اٹک میں عید الاضحی کے موقع پر مویشی منڈیوں میں بہترین انتظامات کیے گئے ہیں۔ ضلع بھر میں تمام منڈیوں میں کورونا ویسکی نیشن ڈیسک قائم کیے گئے ہیں جہاں پر عوام اپنی ویکسی نیشن کروا سکتے ہیں۔ بعد ازاں انہوں نے سابق ایم پی اے ملک شا ہا ن حاکمین خان کے گھر جا کر ان کی وفات پر ان کے اہل خانہ سے تعزیت اور دعائے مغفرت کی۔