ملک بھر میں 10 محرم الحرام کے موقع پر چھوٹے بڑے شہروں میں جلوس برآمد ہو گئے، اس موقع پر مجالس بھی منعقد کی جا رہی ہیں۔

کراچی میں یومِ عاشور کا نشتر پارک سے برآمد ہونے والا مرکزی جلوس صدر رینبو سینٹر پہنچ گیا۔

جلوس میں موجود ایک شخص شدید گرمی سے بے ہوش ہو گیا جسے اسپتال منتقل کر دیا گیا ہے۔

مرکزی جلوس برآمد ہونے سے قبل نشتر پارک میں مرکزی مجلس ہوئی جس سے علامہ شہنشاہ حسین نقوی نے خطاب کیا۔

جلوس کی طرف آنے والی سڑکیں اور گلیاں کنٹینر رکھ کر بند ہیں جبکہ ایم اے جناح روڈ جزوی طور پر کھلا ہوا ہے، پولیس اور رینجرز جلوس کے روٹ پر موجود ہیں۔

کمانڈ اینڈ کنٹرول روم میں سی سی ٹی وی کیمروں کی مدد سے جلوس کی مانیٹرنگ کی جا رہی ہے، بلند عمارتوں پر پولیس اور رینجرز کی نفری اور اسنائپر تعینات ہیں۔