کوہاٹ: 3 افراد دریائے سندھ میں ڈوب گئے، نعشیں برآمد  

کوہاٹ +کراچی (نوائے وقت رپورٹ+سٹاف رپورٹر) کوہاٹ میں دریائے سندھ میں شکردرہ کے قریب تین افراد ڈوب کر جاں بحق ہو گئے۔ پولیس کے مطابق مقامی لوگوں نے تینوں افراد کی نعشیں دریائے سندھ سے نکال لیں، شناخت کی جا رہی ہے۔کراچی سے متصل حب ندی میں نہاتے ہوئے باپ بیٹا ڈوب کر جاں بحق ہو گئے۔ ریسکیو ذرائع کے مطابق جاں بحق ہونے والے دونوں افراد کی لاشیں ندی سے نکال لی گئی ہیں۔ ذرائع نے بتایا ہے کہ ڈوبنے والے باپ بیٹے کا تعلق کراچی کے علاقے کورنگی سے ہے جن کی شناخت 50سالہ عبدالقادر اور 23سالہ غلام حسین ولد عبدالقادر کے ناموں سے ہوئی ہے۔ لاشوں کو حب کے سول اسپتال منتقل کر دیا گیا ہے۔