ساہیوال+ کلرکہار+ فیصل آباد (نمائندگان + آئی این پی) ٹریفک حادثات میں پانچ افراد جاں بحق ہو گئے۔ تفصیلات کے مطابق ساہیوال عارفوالا روڈ بائی پاس پر یوٹرن پر موٹر سائیکل سوار جعفر اپنی والدہ انور بی بی اور ہمشیرہ کے ہمراہ جا رہا تھا کہ وین کی ٹکر سے ماں بیٹی دم توڑ گئیں۔ دریں اثناء کلرکہار میں موٹروے پر بھٹی گجر کے قریب کار ٹرک سے ٹکرانے سے 45  سالہ ساجدہ اور 17 سالہ بیٹا جبران  موقع پر ہی جان کی بازی ہار گئے۔ کار میں ایک ہی فیملی کے افراد سفر کررہے تھے۔ حادثے کا شکار فیملی کے افراد راوی روڈ لاہور کے رہائشی بتائے گئے ہیں۔ زخمیوں میں گھر کا سربراہ اسجد، بیٹا حریرہ اور 14 سالہ بیٹی حرین شامل ہیں۔ 2 شدید زخمیوں کو ابتدائی طبی امداد کے بعد راولپنڈی ریفر کر دیا گیا۔ علاوہ ازیں فیصل آباد میں فیڈمک سے ساہیانوالہ  موٹر وے پر کار بے قابو ہو کر الٹ گئی۔ بیس سالہ مقدس ساکن لاہور موقع پر ہی جاں بحق ہو گئی جبکہ تئیس سالہ فریحہ فاروق اور پچیس سالہ عمر فاروق ساکن لاہور شدید زخمی ہو گئے۔ زخمیوں کو الائیڈ ہسپتال منتقل کر دیا گیا۔