جوہانسبرگ (بی بی سی + نیٹ نیوز) فٹبال ورلڈ کپ میں گزشتہ روز سوئیٹزرلینڈ نے سپین کو 1-0 سے ہرا کر عالمی کپ 2010ءکا پہلا بڑا اپ سیٹ کردیا۔ اس سے قبل کھیلے گئے میچ میں چلی نے ہنڈراس کو صفر کے مقابلے میں ایک گول سے شکست دی جبکہ ورلڈ کپ کے تیسرے میچ میں یوراگوئے نے جنوبی افریقہ کو 3-0 سے ہرایا۔ چلی کی طرف سے بسچور نے ایک گول کرکے ٹیم کو فتح سے ہمکنارکیا۔ سپین اور سوئیٹزرلینڈ کے میچ میں سوئیٹزرلینڈ کے فرنینڈس نے گول کیا۔ اس کے بعد سپین کے کھلاڑیوں نے سوئیٹزرلینڈ کے گول پوسٹ پر متعدد حملے کئے تاہم وہ گول کرنے میں ناکام رہے۔ سوئیٹزرلینڈ کے گول کیپر نے کئی یقینی گول بچا لئے اور سپین کے کھلاڑیوں کو اپنی ٹیم کی برتری نہ ختم کرنے دی۔ یوراگوئے اور جنوبی افریقہ کے میچ میں یوراگوئے کے فورسدن نے 2 جبکہ پیریرایہ نے ایک گول کیا۔ پیریرایہ نے پنلٹی کک پر گول کیا۔