قومی ٹیم کی ناقص کار کر دگی پر شائقین کرکٹ کاشدید احتجاج، نعرے بازی

 برمنگھم (این این آئی)آئی سی سی چیمپنز ٹرافی میں قومی ٹیم کی ناقص کار کر دگی پر شائقین کرکٹ نے شدید احتجاج کرتے ہوئے کھلاڑیوں کے خلاف نعرے بازی کی ۔بھارت سے شکست کے بعد شائقین کرکٹ نے کھلاڑیوں کیخلاف نعرے بازی کی، ہم اتنی دور سے میچ دیکھنے یہاں آئے، کئی سو پانڈ خرچ کئے، بارش میں بھیگتے رہے مگر کھلاڑیوں نے کوئی صلہ نہ دیا، کم از کم بھارت کیخلاف ہی ٹیم جیت جاتی تو ہمارے آنسو کچھ پونچھے جاتے، انھوں نے ٹیم سے چلے ہوئے کارتوسوں کو بھی نکالنے کا مطالبہ کیا،روانگی کے موقع پر پولیس کو ٹیم اور شائقین میں فاصلہ برقرار رکھنے کیلئے سخت محنت کرنا پڑی۔ دوسری جانب بھارتیوں کی خوشی کا کوئی ٹھکانہ نہ تھا اور وہ پاکستانی شائقین پر فقرے بازی بھی کرتے رہے۔