لاہور(سپورٹس رپورٹر) چیمپیئنز ٹرافی میں ناقص کارکردگی کا مظاہرہ کرنے والے پاکستان ٹیم انگلینڈ سے ٹولیوں کی شکل میں وطن واپس لوٹے گی۔ پاکستان ٹیم ٹورنامنٹ کے ابتدائی راونڈ کے تینوں میچوں میں شکست سے دوچار ہو کر ایونٹ سے آوٹ ہو گئی تھی۔ پاکستان کرکٹ بورڈ کے ذرائع کے مطابق پاکستان کھلاڑیوں کی وطن واپسی کا سلسلہ آج پیر سے شروع ہوگا بعض کھلاڑی اپنی نجی مصروفیات کی بنا پر لندن میں ہی رہیں گے جبکہ باقی کھلاڑیوں کی اکثر مختلف ٹولیوں کی شکل میں پاکستان واپس پہنچےں گے۔ واضح رہے کہ آئی سی سی چیمپیئنز ٹرافی کے آخری ایونٹ میں شرکت کے لیے قومی ٹیم دورہ یورپ پر روانہ ہوئی تھی۔ قومی ٹیم نے ٹورنامنٹ سے قبل آئر لینڈ اور سکاٹ لینڈ کے خلاف دو دو پریکٹس میچوں میں حصہ لیا جبکہ ٹورنامنٹ میں اسے بھارت، جنوبی افریقہ اور ویسٹ انڈیز کے ساتھ گروپ بی میں رکھا گیا تھا۔ پاکستان ٹیم کو تینوں ٹیموں کے ہاتھوں شکست سے دوچار ہونا پڑا۔