اسلام آباد (خصوصی نامہ نگار) وزیر خارجہ بلاول بھٹو زرداری نے کہا ہے کہ پاکستان نے ماضی میں امریکہ اور چین  کے درمیان سفارتی تعلقات قائم کرنے میں پل کا کردار ادا کیا ہے اور اب بھی   بڑی طاقتوں کے درمیان  یہ  کردار ادا کرنے کی صلاحیت رکھتا ہے۔  امریکہ کے ساتھ ساتھ بھارت  سے بھی  اقتصادی روابط میں اضافہ کرنا ہو گا۔ کوئی شک نہیں کہ چین کے عوام کے ساتھ پاکستان کا رشتہ مضبوط سے مضبوط تر ہوتا چلا جائے گا۔ ہم اپنے اقتصادی روابط  میں اضافہ کے لئے  پرعزم ہیں، ہم نے چین پاکستان اقتصادی راہداری کے ذریعے بہت کچھ حاصل کیا  ہے۔ وزیر  خارجہ نے ان خیالات کا اظہار اسلام آباد میں انسٹی ٹیوٹ آف سٹرٹیجک سٹڈیز کے یوم تاسیس کی تقریب سے خطاب کرتے ہوئے کیا۔ وزیر خارجہ نے کہا کہ ہمیں پاکستان کے لیے اندرونی اور بیرونی طور پر خود کو چلانے کے لیے نئے راستے تلاش کرنا ہوں گے۔ پاکستان کو ناقابل یقین فکری صلاحیتوں سے نوازا گیا ہے۔ ہمارے دانشوروں، ہماری سول سوسائٹی، ہمارے تعلیمی اداروں نے مفکرین کی ایک استعاراتی فوج تیار کی ہے۔ پاکستانیوں کو دوسرے بہت سے ممالک پر ایک منفرد برتری حاصل ہے کیونکہ ہماری موجودگی، ہماری آبادی پاکستان تک محدود نہیں ہے۔ کہتے ہیں کہ پاکستانی دنیا کے ہر کونے میں موجود ہیں اور ہم بین الاقوامی سطح پر بھی زندگی کے تمام شعبوں میں اپنا حصہ ڈالتے ہیں۔ انہوں نے کہا بدقسمتی سے خارجہ پالیسی پر پاکستان کی گفتگو اس سطح پر نہیں بڑھ پا رہی ہے جو خاص طور پر پاکستانی عوام کو تعلیم دینے، پاکستانی عوام کو ہماری خارجہ پالیسی کا اصل تناظر، آج دنیا میں کیا ہو رہا ہے اور پاکستان کے عوام کو سمجھانے کے لیے ضروری ہے۔ شمال میں ہمارا پڑوسی چین ہے، جو ہمارا ہر موسم کا دوست ہے۔ ہم اسے پسند کریں یا نہ کریں، ہم اس حقیقت کو کبھی تبدیل نہیں کر سکیں گے کہ بھارت بھی ہمارا پڑوسی ہے اور دوسری طرف ہمارے پاس ایران ہے جہاں سے میں ابھی واپس آیا ہوں اور یقیناً افغانستان۔ لہٰذا، یہ دیکھنا بہت آسان ہے کہ عالمی جغرافیائی سیاسی واقعات کی ترقی کا پاکستان پر براہ راست اثر پڑا ہے، لیکن، کیا ہم نے خود کو اس طرح سے چلایا ہے کہ ان چیلنجوں کا مقابلہ کریں اور انہیں نہ صرف چیلنجز بلکہ ایک موقع کے طور پر بھی دیکھیں؟۔ مجھے نہیں لگتا۔ مجھے یقین ہے کہ ہم کوشش کر رہے ہیں۔ پاکستان جو فیصلے کرتا ہے، مجھے یقین ہے کہ اس سے نہ صرف واقعات یا سمت بدلے گی، بلکہ پاکستان جو فیصلے لیتا ہے اس کا براہ راست عالمی واقعات پر اثر پڑے گا۔ جس طرح سے دنیا کا بیشتر حصہ آج عالمی واقعات، عالمی طاقت کے تنازعے، عظیم طاقت کے تصادم کو دیکھ رہا ہے۔ کیا یہ عظیم طاقت کا ٹکرائو  پاکستان کے مفاد میں ہے؟ کیا پاکستان تنازعات، تنائو بڑھانے کے بجائے کم کرنے، ٹالنے یا اپنا کردار ادا کرنے کے لیے کچھ کر سکتا ہے۔  مجھے یقین ہے کہ ہمارے پاس ماضی  ہے اور ہم دوبارہ ایسا کر سکتے ہیں۔ اگر چین کے ساتھ ہمارے تعلقات کے تناظر میں دیکھا جائے۔ ہم نے چین پاکستان اقتصادی راہداری کے ذریعے بہت کچھ حاصل کیا ہے اور جہاں تک اقتصادی صلاحیت کا تعلق ہے، ہمارے لیے مزید بہت کچھ ہے۔ اگر عالمی واقعات کی ترقی اسی طرح چلتی ہے جیسا کہ ہم آج دیکھ رہے ہیں، تو یہ یقیناً پاکستان کے مفادات کو پورا نہیں کرے گی کہ ہمارے پڑوس میں طاقت کا زبردست تنازعہ شروع ہو جائے اور اس کے نتائج ہمارے لوگوں اور ہمارے خطے کے لیے اہمیت کے حامل ہوں۔ بھارت کے ساتھ تعلقات سے متعلق بات کرتے ہوئے بلاول بھٹو زرداری کا کہنا تھا کہ اسلاموفوبیا کی مہم خطرناک حد کو چھونے لگی ہے۔ بی جے پی رہنماؤں کے بیانات نے بھارت میں تشدد کو ہوا دی ہے۔ وہاں ہندووتوا ذہنیت پنپ رہی ہے،بھارت کے ساتھ تنازعات کا ذکر کرتے ہوئے کہا کہ بھارتی حکومت نے 5 اگست2019 کو اپنے یکطرفہ اقدامات کے ذریعے کشمیر کی بین الاقوامی سطح پر تسلیم شدہ متنازعہ حیثیت کو تبدیل کرنے کی کوشش کی۔ انہوں نے کہا کہ بھارت اپنے غیر قانونی زیر تسلط جموں و کشمیر میں مسلم اکثریت کو اقلیت میں تبدیل کرنے کے اقدامات کررہا ہے جبکہ مئی میں حد بندی کمیشن کا اقدام اس کی ایک کڑی ہے۔وزیر خارجہ نے کہا کہ بھارت کی موجودہ حکومت ہندوتوا ایجنڈے پر سرگرم ہے، اسلاموفوبیا اور بی جے پی لیڈروں کے حالیہ ریمارکس سے سنگین ماحول پیدا ہورہا ہے اور بھارت میں ہندوتوا کے نظریئے کو بالادست بنایا جارہا ہے۔ انہوں نے کہا کہ پاکستان کی موجودہ حکومت کو مسائل گزشتہ حکومت سے ورثے میں ملے ہیں جن سے نمٹنے کے لئے حکومت بھرپور اقدامات کررہی ہے۔ انہوں نے مزید کہا کہ محترمہ بے نظیر شہید کے دور میں بھارت سے معاشی روابط مضبوط تھے۔ ہمیں  اس کو بڑھانا ہو گا۔ وزیر خارجہ نے کہا کہ عالمی طاقتوں امریکا اور چین کے درمیان اقتصادی  روابط کی بنا پر یہ قضیہ اتنا نہیں بڑھا جتنا بڑھ سکتا تھا۔ ہمیں ان اقتصادی  روابط کو اتنا بڑھانا ہو گا کہ ہم ان کی خارجہ پالیسی اور پالیسی سازوں کو متاثر کر سکیں۔ اس طرح سے ہم جارح کو بے نقاب کر سکتے ہیں۔بلاول بھٹو زرداری نے کہا کہ ہم پاکستانی اس وقت انسانیت کے ایک مشکل ترین دوراہے پر کھڑے ہیں۔ ماحولیاتی تبدیلیوں کا اتنا سنجیدہ چیلنج ہے کہ کوئی پاکستانی اس کا انکار نہیں کر سکتا۔ ہمیں اس وقت کووڈ کے باعث سپلائی چین کے براہ راست اثرات کا سامنا ہے۔یوکرائن کی جنگ کا ہر پاکستانی کی زندگی پر براہ راست اثر پڑا ہے۔ انہوں نے کہا کہ یہ وقت ہے کہ اس وقت اقتصادی سفارت کاری پر توجہ دی جاے اور انگیج کیا جائے۔ افغانستان خود تاریخ کے مشکل دوراہے پر موجود ہے۔ پاکستان کے ہر طرف بحرانوں کا انبار ہے۔ وزیر خارجہ بلاول بھٹو زرداری نے کہا ہے کہ پاکستان کو مستقبل میں اعلیٰ مقام دلانے کے لئے کوشاں ہیں، ملک کی خارجہ پالیسی جیوپولیٹیکل اثرات سے براہ راست متاثر ہورہی ہے، اس صورتحال میں ہمیں اپنے جغرافیائی مقام کو استعمال کرکے اچھے مواقع تلاش کرنا ہوں گے۔ نوجوانوں کو مثبت سرگرمیوں میں مصروف رکھنے کیلئے کام کر رہے ہیں۔ وزیرخارجہ بلاول بھٹو زرداری کے ٹویٹ کے مطابق وزیرخارجہ سے قطر کے سفیر شیخ سعود عبدالرحمن آل ثانی نے ملاقات کی جس میں باہمی دلچسپی پر مبنی دوطرفہ علاقائی و عالمی معاملات پر بات چیت ہوئی۔ قطر کے سفیر سے دوطرفہ تعلقات مزید مضبوط کرنے اور اقتصادی تعاون مزید بڑھانے پر اتفاق ہوا۔ نجی ٹی وی کے مطابق توانائی کے شعبے میں مشترکہ تعاون کا اعادہ کیا گیا۔