کاہنہ، پاکپتن، ساہیوال، بہاولنگر (نامہ نگاران) مختلف شہروں میں ٹریفک حادثات میں 3 سگے بھائیوں سمیت 10 افراد جاں بحق جبکہ 4 زخمی ہوگئے۔ کاہنہ میں ٹریکٹر ٹرالی سے گر کر اور ٹریکٹر ٹرالی کی ٹکر سے سائیکل سوار دو افراد جاں بحق ہوگئے۔کاہنہ فیروز پور روڈ ایلیٹ ٹائون سٹاپ کے سامنے مختار مسیح سائیکل پر جارہا تھا کہ تیز رفتار ٹریکٹر ٹرالی کی ٹکر سے موقع پر مارا گیا جبکہ دوسرے واقعہ میں اچانک بریک لگانے سے ٹریکٹر ٹرالی کے اوپر بیٹھا نوجوان فہیم اختر گر کر ٹائروں کے نیچے آکر جاں بحق ہو گیا۔پاکپتن کے گائوں 161/EB کے قریب تیز رفتار ٹریکٹر ٹرالر اور رکشہ میں تصادم ہوگیا جس کے نتیجہ میں محمد علی اور محمد عرفان جاں بحق ہوگئے۔ ساہیوال میں نور شاہ فیصل آباد روڈ پر خطرناک موڑ کے قریب ایک تیز رفتار کار اُلٹ جانے کے نتیجہ میں دو سگے بھائی، بہن نعیم اقبال اور نویدہ اقبال جاں بحق جبکہ چار افراد شدید زخمی ہوگئے۔ منچن آباد روڈ اڈا چبیانہ کے قریب 2موٹرسائیکل ٹریکٹر ٹرالی تھریشر سے ٹکرا گئیں جس کے نتیجے میں 3 سگے بھائیوں سمیت ایک ہی خاندان کے 4افراد جاں بحق ہوگئے۔ حادثے میں جامع مسجد کے خطیب مولانا حسن اور تبلیغی جماعت کے مقامی امیرکے تین سگے بیٹے محمد، زبیر اور ابوبکر مارے گئے۔