تھائی لینڈ:کورونا لاک ڈاؤن،غذا کی تلاش میں بندروںکا ٹاؤن ہال پر دھاوا

تھائی لینڈ میں بھوک سے تڑپنے والے بندروں نے ٹاﺅن ہال پر دھاوا بول دیا۔غیرملکی خبررساں ادارے کی رپورٹ کے مطابق کروناوائرس کے پیش نظر تھائی لینڈ میں بھی شہری گھروں سے غیرضروری طور پر باہر نہیں نکل رہے اور سیاحوں پر بھی عارضی طور پر پابندی عائد کی گئی ہے۔اس صورت حال کے پیش نظر سڑکوں پر گھومنے والے بندر بھوک سے مر رہے ہیں، گھروں میں محصور ہونے کے باعث کوئی بھی شہری بندروں کو غذا فراہم کرنے سے قصر ہے اور نہ ہی ارد گرد سیاح نظر آرہے ہیں۔رپورٹ میں کہا گیا ہے کہ تھائی لینڈ کے صوبے پراچھپ میں قائم ٹاﺅن ہال پر بندروں نے غذا کی تلاش میں دھاوا بول دیا۔ اس دوران وہاں موجود کئی افراد پر بھوکے بندروں نے حملے بھی کیے۔خیال رہے کہ کرونا وائرس کے سبب دنیا بھر میں سیاحت کا شعبہ بھی بری طرح سے متاثر ہوا، تھائی لینڈ وہ ملک ہے جہاں روزانہ کی بنیاد پر دنیا بھر سے لوگ سیاحت کے لیے پہنچتے تھے مگر اب صورت حال بہت مختلف ہے۔تھائی لینڈ آنے والے سیاح سڑک پر گھومنے والے بندروں کو کھانا ڈالتے تھے البتہ اب صورت حال یہ ہے کہ بندر بھوک سے تڑپ رہے ہیں اور انہیں کھانا دینے والا کوئی بھی نہیں ہے۔