رونالڈو نے پیلے کا سب سے زیادہ کیریئر گولز کا ریکارڈ توڑ دیا

ٹیورن / میلان (پی پی آئی) کرسٹیانو رونالڈو نے پیلے کا سب سے زیادہ کیریئر گولز کا ریکارڈ توڑ دیا۔رونالڈو نے یووینٹس کی جانب سے کیگلیری کے خلاف ہیٹ ٹرک کی،جس سے کلبز اور ملک کیلئے مجموعی گولز کی تعداد 770ہوگئی۔پیلے نے اپنا ریکارڈ توڑنے پر رونالڈو کے نام جذباتی پیغام میں کہا کہ مجھے سب سے زیادہ افسوس اس بات پر ہے کہ میں آپ کو گلے نہیں لگا سکتا۔یووینٹس کے پرتگالی اسٹار کرسٹیانو رونالڈو تنقید پر میڈیا سے ہی ناراض ہوگئے،کیگلیری کے خلاف 32 منٹ میں 3  گول داغ کر انھوں نے ٹیم کو فتح دلائی جس کے بعد میڈیا سے بات ہی نہیں کی، انھیں اب اس پر تنقید کا نشانہ بنایا جارہا ہے۔دوسری جانب یووینٹس کے کوچ اینڈری پیرلو نے رونالڈو کا دفاع کرتے ہوئے کہا کہ چونکہ وہ پچ پر بات کرچکے تھے اس لیے دوبارہ گفتگو نہیں کی۔کرسٹیانو رونالڈو نے ہیٹ ٹرک سے ناقدین کے منہ بند کردیے،انھوں نے اپنی ٹیم یووینٹس کو سیری اے میں کیگلیری پر 0-3 سے فتح دلائی،چیمپئنز لیگ سے ٹیم کے5  روز قبل باہر ہونے کی وجہ سے سب سے زیادہ رونالڈو کو تنقید کا نشانہ بنایا جارہا تھا،دوسری جانب انٹرمیلان نے ٹورینو کو 1-2 سے مات دے کر سیری اے کے ٹاپ پر 9 پوائنٹس کی واضح برتری حاصل کرلی ہے۔