پاکستانی ٹینس اسٹار اعصام الحق نے زندگی کی 42بہاریں دیکھ لی ہیں جس پر ٹینس شائقین اور مداحوں کی جانب سے مبارکبادوں کا سلسلہ شروع ہوگیا۔
تفصیلات کے مطابق رواں برس کے دوران اعصام الحق کی کارکردگی زیادہ حوصلہ افزاء نہیں رہی۔ تاہم ٹینس کے میدان میں متعدد کارنامے سرانجام دے کر وطن کا نام روشن کرنے والے اعصام الحق کی سالگرہ پر سوشل میڈیا صارفین نے انہیں مبارکباد دی۔حال ہی میں میلبرن میں اے ٹی پی ورلڈ رینکنگ ٹینس چیمپین شپ کے ڈبلز ایونٹ کے فائنل میں اعصام الحق اور قازقستان کےا لیکزینڈر نیڈوسوو کی جوڑی اسٹریٹ سیٹس میں شکست کھا گئی۔ دونوں کا مقابلہ نیدر لینڈ اور برطانیہ کے کھلاڑیوں سے تھا۔
رواں برس کے آغاز پر جنوری کے دوران فائنل مقابلے میں اعصام الحق اور الیکزینڈر کی جوڑی کمال کرنے میں ناکام رہی۔ مخالف کھلاڑیوں نے اسٹیٹ سیٹس میں 4-6، اور 4-6 سے فتح حاصل کی تاہم اعصام الحق ٹینس کے علاوہ بھی عوام میں خاصے مشہور ہیں۔
واضح رہے کہ 17 مارچ 1980 کو جنم لینے والے اعصام الحق کو پاکستان کا ٹاپ ٹینس اسٹار سمجھا جاتا ہے جو واحد پاکستانی کھلاڑی ہیں جو گرینڈ سلیم کے فائنل تک پہنچے۔ انہوں نے یہ کارنامہ 2010 میں سرانجام دیا تھا۔