چکوال + صادق آباد + خانیوال (آن لائن+ آئی این پی + نوائے وقت رپورٹ) چکوال کے قصبہ مونا کے قریب ٹرک اور وین کے درمیان خوفناک تصادم کے نتیجے میں ایک ہی خاندان کے 5 افراد موقع پر ہی جاں بحق جبکہ 11افراد شدید زخمی ہو گئے۔ واقعہ کے بعد مقامی لوگ، امدادی ٹیمیں اور پولیس اہلکار جائے وقوعہ پر پہنچ گئے اور امدادی کارروائیوں میں حصہ لیتے ہوئے نعشوں اور زخمیوں کو ہسپتال پہنچایا۔ تین کی حالت تشویشناک بتائی جاتی ہے جبکہ نعشوں کو ضروری کارروائی کے بعد ورثاء کے حوالے کر دیا گیا۔ جاں بحق افراد کا تعلق ایک ہی خاندان سے ہے جن میں 3 مرد اور 2 خواتین شامل ہیں۔ پولیس کا کہنا تھا کہ حادثہ تیزرفتاری کے باعث پیش آیا۔ جاں بحق ہونے والوں میں عبد الرحیم، عبدالشکور، زاہد اقبال، مہوش اور راحیلہ شامل ہیں۔ دوسری جانب حضرت لعل شہباز قلندر کے عرس میں شرکت کے لئے صادق آباد سے زائرین کو سیہون لے جانے والی بدقسمت بس چوک بہادر آباد کے قریب تیز رفتاری کے باعث بے قابو ہو کر الٹ گئی۔ حادثے کے نتیجے میں خواتین اور بچوں سمیت 30 افراد زخمی ہو گئے۔ ادھر خانیوال میں عبدالحکیم روڈ پر تیز رفتار بس نے کار کو ٹکر مار دی حادثے میں خاتون سمیت 5 افراد جاں بحق ہو گئے۔