سوڈان، شارجہ اور عراق سے 714 پاکستانی خصوصی فلائیٹس سے پاکستان پہنچ گئے‘ تمام قرنطینہ منتقل

اسلام آباد، پشاور‘ ملتان (نوائے وقت رپورٹ) سوڈان، شارجہ اور عراق سے 714 پاکستانی خصوصی فلائیٹس سے پاکستان پہنچ گئے۔ سوڈان میں پھنسے پاکستانیوں کو لیکر خصوصی پرواز پشاور ائرپورٹ پہنچ گئی۔ ائرپورٹ حکام کے مطابق پرواز سے 249 پاکستانی سوڈان سے واپس آئے ہیں۔ شارجہ سے بھی ایک خصوصی پرواز 215 مسافروں کو لیکر ملتان پہنچ گئی۔ مسافروں کو ابتدائی سکریننگ کے بعد قرنطینہ منتقل کر دیا گیا ہے۔ ملکی فضائی تاریخ میں پہلی بار سوڈان سے کوئی فلائٹ پشاور آئی ہے۔جبکہ پی آئی اے کا خصوصی طیارہ عراق میں پھنسے پاکستانیوں کولے کر وطن پہنچ گیا ۔پی آئی اے کی پرواز پی کے 710 کے ذریعے 250 سے زائد مسافر اسلام آباد ایئرپورٹ پہنچے۔ مسافروں کی طبی جانچ اورسکریننگ کے بعد انہیں سوہاوہ اور جہلم کے قرنطینہ مراکز میں منتقل کر دیا گیا ۔