مرحومہ کی نماز جنازہ گھر کے قریب مسجد میں ادا کی گئی،سینکڑوں افراد کی شرکت
کراچی کے علاقے کھارادر بم دھماکے میں جاں بحق ہونے والی خاتون کو آہوں سسکیوں کے ساتھ میوہ شاہ قبرستان میں سپردخاک کر دیا گیا۔تفصیلات کے مطابق کھارادر کے علاقے نیو میمن مسجد بولٹن مارکیٹ کے عقب میں واقع بمبئی بازار میں گزشتہ شب موٹر سائیکل بم دھماکے میں جاں بحق ہونے والی خاتون گارڈن شو مارکیٹ کی رہائشی تھی، خاتون گھر میں دوپٹے کی تیاری اور کپڑوں کی سلائی کا کام کرتے تھی واقعہ کے وقت وہ دوپٹوں کی سپلائی دینے مارکیٹ آئی تھی۔جاں بحق ہونے والی 30 سالہ خاتون 4 بچوں کی ماں تھی سب سے بڑی تقریبا 14 سال کی بیٹی ہے، مرحومہ کا شوہر علاقے میں میڈیکل سٹور پر ملازمت کرتا ہے ، مرحومہ کی نماز جنازہ گھر کے قریب مسجد میں ادا کی گئی،نماز جنازہ میں قریبی رشتہ داروںسمیت سینکڑوں افراد نے شرکت کی، میوہ شاہ قبرستان میں آہوں اور سسکیوں کے ساتھ سپرد خاک کردیا گیا۔ واضح رہے کہ بولٹن مارکیٹ کے قریب دھماکیمیں خاتون جاں بحق اور 10 افراد زخمی ہوگئے تھے، دھماکے میں پولیس وین کو نشانہ بنایا گیا تھا اور دھماکے کی جگہ پر ساری کپڑے کی دکانیں تھیں۔