نئی دہلی(این این آئی)کانگریس کے نائب صدر راہول گاندھی نے طویل عرصے سے اپنی غیر سنجیدہ اور مضحکہ خیز تقاریراور بیانات کی وجہ سے سوشل میڈیا کو کامیڈی باکس میں تبدیل کر رکھا ہے ، اب انہوں نے آلو سے سونا بنانے والی مشین کا شوشہ چھوڑ کر سوشل میڈیا کے صارفین کو اپنی طرف متوجہ کر لیا ہے۔بھارتی ٹی وی کے مطابق بھارتی ریاست گجرات میں راہول گاندھی نے تقریر میں آئندہ انتخابات کے لئے وزیر اعظم نریندر مودی کی طرف سے کئے گئے مختلف وعدوں پر اپنے خیا لات کے ذریعے روشنی ڈالتے ہوئے کہا کہ ایسی مشین لگائوں گا، اِس سائیڈ سے آلو گھسے گا، اْس سائیڈ سے سونا نکلے گا۔صارفین نے تقریباً آدھے گھنٹے کی تقریر میں سے 20 سیکنڈ کے اس مزاح سے بھرپور کلپ کو سوشل میڈیا پر خوب شیئر کیا۔