عوام کو سبزباغ دکھا کر اقتدار میں آنیوالے بے نقاب ہوگئے: ندیم ممتاز

ملتان (سپیشل رپورٹر)چیئرمین مستقبل پاکستان انجینئر ندیم ممتاز قریشی نے کہا کہ سازشی اور عوام کو سبز باغ دکھلا کر اقتدار کی منزل پانے والے سیاستدان بے نقاب ہورہے ہیں ،ملک میں حقیقی تبدیلی مستقبل پاکستان ہی لے کر آئے گی،احتساب کے عمل کو پایہ تکمیل تک پہنچانا ملکی تعمیر و ترقی کیلئے بہت ضروری ہے ان خیالات کا اظہار انہوں نے عوامی اجتماع سے خطاب کرتے ہوئے کیا ۔انہوںنے کہا کہ پاکستان ایک آزاد اور خود مختار اسلامی ملک ہے جہاں پر تمام تر آئین و قانون اسلامی تعلیمات کی روشنی میں بنائے جاتے ہیں۔ انہوںنے مزید کہا کہ امریکہ کا پاکستان سے توہین رسالت کے قوانین کو منسوخ کرنے کا مطالبہ پاکستان کے اندرونی معاملات میں نہ صرف مداخلت بلکہ مذہبی جذبات کو مجروح کرنے کے مترادف ہے۔ عقیدہ ختم نبوت ہمارے ایمان کا لازمی جزو جس پر کوئی کمپرومائز نہیں ہوسکتا۔