معزول سوڈانی صدرکے خلاف مالی بدعنونی مقدمے کافیصلہ 14دسمبر کو سنانے کا اعلان

سوڈان کی ایک عدالت نے معزول صدر عمر البشیر کے مالی بدعنوانی کے کے مقدمہ کا فیصلہ سنائے جانے کے لیے 14 دسمبر کو آخری تاریخ مقرر کردی ہے اور کہا ہے کہ سابق صدر کے خلاف وسط دسمبر کوبدعنوانی کیسز کا فیصلہ سنایا جائے گا۔میڈیارپورٹس کے مطابق عدالت کے جج جسٹس صادق عبد الرحمن نے سابق صدر کی موجودگی میں دفاعی گواہوں کی سماعت کے لئے وقف کردہ سیشن کے اختتام پر کہا کہ معزول صدر عمر البشیر کے مقدمہ کی سماعت مکمل ہوچکی ہے۔ اب اس کیس کا فیصلہ 14 دسمبر کو سنایا جائے گا۔سمعت میں شریک ایک اے ایف پی نمائندے کے مطابق فرد جرم عائد کرنے اور دفاع سے متعلق فریقین کے دلائل تحریری طور پر عدالت میں پیش کیے جائیں گے اور فیصلے کے اعلان کے سوا اب مزید کوئی سماعت نہیں ہوگی۔دریں اثنا برطرف سوڈانی صدر عمر البشیر کے درجنوں حامیوں نے خرطوم کی عدالت میں مالی بدعنوانی کے الزامات سے متعلق کیس کی سماعت کے موقع پرعدالت کے باہر مظاہرہ کیا۔ مظاہرین معزول صدر کا ٹرائل بند کرنے اور ان کی فوری رہائی کے لیے نعرے لگا رہے تھے۔مظاہرین نے سابق صدر کی حمایت اور بین الاقوامی فوجداری عدالت کی مذمت میں بھی نعرے بازی کی۔ مظاہرین نے نعرے لگائے کہ عمر البشیرآپ تنہا نہیں، ہم آپ کے ساتھ ہیں، آپ نے کوئی خیانت یا بد دیانتی نہیں، ہم آپ کو عالمی فوج داری عدالت کے حوالے نہیں کرنے دیں گے۔