لاہور (سٹاف رپورٹر) پنجاب یونیورسٹی کے تین پروفیسرز سٹینفورڈ یونیورسٹی کیلفورنیا کی جاری کردہ دنیا کے بہترین محققین کی فہرست میں 2 فیصد محققین میں شامل ہو گئے ہیں۔ ان میں پنجاب یونیورسٹی کے ڈین فیکلٹی آف مینجمنٹ سائنسز ڈاکٹر خالد محمود، ڈین فیکلٹی آف سائنس ڈاکٹر محمد شریف اور پنجاب یونیورسٹی شعبہ ریاضی کے ڈاکٹر محمد اکرم محققین میں شامل کر لئے گئے۔ عالمی درجہ بندی میں تمام شعبوں سے ایک لاکھ ساٹھ ہزار محققین کو شامل کیا گیا۔ پنجاب یونیورسٹی کے محققین کو اپنے تحقیقی مقالوں کی بین الاقوامی جانچ پڑتال کی بنیاد پر منتخب کیا گیا۔ اس شاندار بین الاقوامی کامیابی پر وائس چانسلر پنجاب یونیورسٹی پروفیسر نیاز احمد اختر نے اساتذہ کو مبارکباد پیش کی۔