ستمبر: حکومت نے 49 ہزار 399 ارب قرض لیا، 2021ء کی نسبت 22.7 فیصد زائد 

اسلام آباد (نمائندہ خصوصی) سٹیٹ بنک نے حکومت کی جانب سے ستمبر میں لئے گئے قرض کی تفصیلات جاری کر دی ہیں۔ جاری اعدادوشمار کے مطابق حکومت نے ستمبر میں مجموعی طور پر 49 ہزار 399ارب روپے کا قرضہ لیا جو اس سے پچھلے ماہ اگست کے مقابلے میں 0.2 فیصد کم ہے، حکومت نے اگست میں 49 ہزار 617 ارب روپے کا قرضہ لیا تھا۔ سالانہ بنیادوں پر دیکھا جائے تو ستمبر2021ء کے مقابلے میں یہ قرض 22.7 فیصد زیادہ ہے، پچھلے سال ستمبر میں حکومت کی جانب سے لئے گئے قرضے کی مجموعی مالیت 40 ہزار 269 ارب روپے تھی۔ حکومت نے ستمبر میں اندرونی ذرائع (بنکوں اور دیگر مالیاتی اداروں) سے 31 ہزار 402 ارب روپے کا قرض لیا جو اس سے پچھلے ماہ اگست کے مقابلے میں 2.2 فیصد کم ہے لیکن گزشتہ سال ستمبر سے موازنہ کیا جائے تو اندرونی ذرائع سے حاصل قرض میں 18.7 فیصد اضافہ ہوا ہے۔اسی طرح بیرون ملک سے ستمبر کے دوران 17 ہزار 997 ارب روپے کا قرض لیا گیا ہے جو اگست کے مقابلے میں 3.3 فیصد زیادہ ہے، اگست میں بیرونی ذرائع سے 17 ہزار 419 ارب روپے کا قرض لیا گیا تھا جب کہ ستمبر 2021ء میں بیرونی ذرائع سے حاصل قرض 30.2 فیصد زیادہ ہے پچھلے سال ستمبر میں 13 ہزار 825 ارب روپے کا قرض لیا گیا تھا۔