آئیڈیاز جیسی نمائشیں پاکستان کی شان بڑھاتی ہیں:پاسبان

کراچی (نیوز رپورٹر)پاسبان ڈیموکریٹک پارٹی کے جنرل سیکریٹری اقبال ہاشمی نے کہا ہے کہ دفاعی نمائش آئیڈیاز جیسی بیں الاقوامی نمائشیں پاکستان کی شان میں اضافہ کرتی ہیں۔دفاعی نمائش کے کامیاب انعقاد پر پاسبان فوجی قیادت کو دلی مبارکباد پیش کرتی ہے- دفاعی نمائش دفاعی معیشت کے لئے بہت اہم ہے۔ مثالی سیاسی و عسکری قیادت کی موجودگی دنیا میں سربلندی کی ضمانت ہے۔ جس طرح آئیڈیاز کا انعقاد کیا جاتا ہے بالکل اسی طرح انجینئرنگ کے شعبے میں 
بھی کام کیا جائے۔ پاکستان کے مستقبل کے مسابقتی معیار کا انحصار انجینئرنگ پر ہے۔ پاکستان کے پاس انجینئرنگ پروڈکشن کا قومی اثاثہ پورے طور پر استعمال کرنے پر پاکستان کی ڈبل ڈیٹ جی ڈی پی گروتھ ہو سکتی ہے۔ پاکستانی اسلحہ سازی کے معیار پر پوری دنیا کو اعتماد ہے اور ہمیں اس پر فخر ہے۔ پاکستان چین اور ترکی کے ساتھ مل کر اسلحہ سازی کے میدان میں نمایاں کام کرسکتا ہے۔آئیڈیاز کا انعقاد ٹیکنالوجی کے تبادلے اور فروغ میں اہم کردار ادا کرتا ہے۔ آئیڈیاز کے پلیٹ فارم سے بین الاقوامی کمیونٹی اور ان کی دفاعی انڈسٹریز کو ہماری مصنوعات کو جاننے کا موقع ملاہے۔ پاسبان پریس انفارمیشن سیل سے جاری کردہ بیان میں پی ڈی پی کے جنرل سیکریٹری اقبال ہاشمی نے دفاعی نمائش آئیڈیاز 2022 کے کامیاب انعقاد پر فخر و خوشی کا اظہار کرتے ہوئے مزید کہا کہ یہ نمائش مینوفیکچرز، مالیاتی ماہرین اوراعلیٰ سطحی پالیسی سازوں کے لیے اہم ہے۔ اس نمائش سے پاکستان کے اسٹریٹجک تعلقات کو نہ صرف مزید استحکام ملاہے بلکہ پاکستان اوردنیا بھر کے ممالک کے درمیان دفاعی صنعت،کاروباراورتعاون کو فروغ حاصل ہوگا۔ افواج پاکستان کی دفاعی صلاحیت کو دیکھ کر عوام کا اپنی افواج پر حوصلہ مزید بلند ہوا ہے۔فوج اور عوام کے درمیان گہرا تعلق اور ہم آہنگی ہے جو کسی بھی قوم کو داخلی یا خارجی خطرات سے مقابلہ کرنے کی اصل طاقت ہے۔ خوشی کی بات ہے کہ معاشی بدحالی اور سیاسی کمزوری کے باوجود دفاعی میدان میں پاکستان کامیاب ہے اور ملک محفوظ ہاتھوں میں ہے۔ معاشی و سیاسی استحکام کے لئے دفاعی استحکام ازحد ضروری ہے۔ کرپٹ سیاست دانوں اور بیورو کریسی سے نجات حاصل کر کے عسکری ٹیکنالوجی کے بعد معیشت مضبوط کرنے کی طرف سنجیدگی سے توجہ دینا ہوگی۔مضبوط دفاع کے لئے فوجی اور معاشی دونوں قوت کا موجود ہونا ضروری ہے۔ ان شا ءاللہ پاکستان ناقابل تسخیر اور سربلند رہے گا۔قوم اپنی افواج کے ساتھ شانہ بشانہ کھڑی ہے اور کھڑی رہے گی ،دوری پیدا کرنے والے رسوا ہونگے۔
پاسبان