کراچی: فائرنگ کے واقعات میں 2 افراد ہلاک، دو دہشت گرد گرفتار

کراچی (نوائے وقت رپورٹ + آئی این پی)کراچی کے علاقے جیل چورنگی کے قریب فائرنگ سے ڈکیتی مزاحمت پر ایک شخص کو قتل کر دیا گیا۔ مقتول کی شناخت 30سالہ اویس کے نام سے ہوئی۔ دوسری جانب مائی کولاچی روڈ پر ڈکیتی مزاحمت پر ایک شخص فائرنگ سے زخمی ہوا جو ہسپتال میں زخموں کی تاب نہ لاتے ہوئے جاں بحق ہوگیا۔ مقتول کا نام جنید بتایا جاتا ہے۔ دریں اثناء ہجرت کالونی سے کالعدم تنظیم طالبان کے دو دہشت گرد گرفتار کرلئے گئے۔ مکان سے بھاری مقدار میں اسلحہ برآمد کرلیا گیا۔ کارروائی پہلے سے گرفتار بشیر خان کی نشاندہی پر کی گئی۔ لیاقت آباد کے علاقے اعظم نگر میں مبینہ پولیس مقابلے میں ایک ملزم گرفتار کرلیا گیا، اسلحہ برآمد کرلیا گیا۔