اللہ نے حضورﷺکوتمام جہانوں کیلئے رحمت بنا کر بھیجا: اعجاز چوہدری 

لاہور(نیوزرپورٹر) تحریک انصاف سنٹرل پنجاب کے صدر سینیٹر اعجازاحمدچوہدری نے مختلف مقامات پر شان رحمت اللعالمین کے سلسلے میں منعقدہ محفل میلاد سے خطاب کرتے ہوئے کہاکہ اللہ تعالیٰ نے حضورنبی کریم ﷺکو تمام جہانوں کے لئے رحمت بنا کر بھیجا، آپ ﷺکی آمد سے دنیا سے جہالت کے اندھیرے چھٹ گئے اور ہر طرف نور کے اجالے پھیل گئے۔ انہوں نے مزید کہاکہ ماہ ربیع الاول کا مہینہ سیرت طیبہ پر عمل کرنے تقاضا کرتا ہے، نوجوان نسل کو رسول اکرم ﷺکی حیات طیبہ کا مطالعہ کرنا چاہئے، آپ ﷺکی سیرت طیبہ پر عمل پیراء ہو کر ہی دنیا و آخرت میں کامیابی حاصل کرسکتے ہیں۔ رسول کریم ﷺ کی زندگی امت مسلمہ کیلئے بہترین نمونہ ہے، ہمیں اپنی زندگیوں کو اطاعت اللہ اور رسول کریم ﷺ کے اسوہ حسنہ کے مطابق گزارنا ہوگا، اس مبارک مہینے میں پوری انسانیت کے رہبر و رہنماء دنیا میں تشریف لائے۔