حضور اکرم ؐ رحمت للعالمین بن کر تشریف لائے:پیر احسن القادری 

کامونکی (نمائندہ خصوصی) حضور اکرم تمام عالمین کے لئے رحمت بن کر تشریف لائے، آپؐ کی پوری حیات طیبہ ہمارے لئے عمل کی ایک واضح اور روشن مثال ہے۔ان خیالات کا اظہار پیر احسن القادری البغدادی نے اپنے بیان میں کیا۔انہوں نے کہاکہ نبی کریم ؐ کی تعلیمات ہر شعبہ زندگی میں ہم مسلمانوں کیلئے ایک ہدایت و رہنمائی ہے۔ نبی کریم ؐ کی ولادت کا جشن مناناہمارے خون میں شامل ہے جس کو جدانہیں کیا جاسکتا۔ انہوں نے کہا کہ ہماری نجات نبی کریمؐ کی تعلیمات اور سنت رسول کی مکمل پیروی ہی میں ہے۔ ہم نے عمومی طور پر حضور ؐ کی سیرت کی تقریبات کو ماہ ربیع الاول تک محدود کر دیا ہے جبکہ ان کا ذکر تو سال بھر تسلسل سے جاری رہنا چاہئے تاکہ ان کی تعلیمات کی روشنی اور نور سے ہم اپنی زندگیوں کی تاریکی کو مٹاتے ہوئے نسل نو کی صحیح خطوط پر تربیت کرسکیں ۔